Presentacion
Centra de Ressorgas
Toponimia
Calendièr
Visitas

 454969 visitaires

 7 visitaires en linha

 
La Dictaa Occitana 2012
a Dieulofèt (26) lo 28 de Genier de 2012

dictada_pichot.jpgPer la region Ròse-Aups la dictaa occitana se fai dempuèi d'ans quora en Droma, quora en Ardecha. En 2011 èran a Anonai, e aquest an 2012 nos acamperam a Dieulofèt, au Collègi Ernest Chalamel lo 28 de Genier.

L'amira de la dictaa es de far valer lo patrimòni lingüistic de lenga d'òc. Fa valer la riquesa de la literatura occitana, mena a tornar descobrir la quita lenga d'òc, e far conéisser que totjorn es lenga de creacion. Mai s'estima lo plaser d'escriure, ni non se truca pas lo candidat amb de dificultats ortograficas.

Es a gratis, populària e dubèrta a totes, joves e adultes. Lo tèxte es pro simple, d'un autor dau país, que permet a totei lei que coneisson un bocin de lenga de se lançar a escriure.

Lo tèxte d'aquela dictaa èra de Chalamel : Lo forn

Lo forn, lo fornier embé sa granda panocha tota cendrosa, vaquí mai doas chausas que se'n van, doas chausas qu'empòrtan embé s-elei un pauc de la viá costumièra de nòstres reires. A l'ora d'encuei, lo bolengier a pres, quasiment pertot, la plaça dau fornier. Autamben, nos apasturan aubé de pan qu'a una façon superba. Nos fan de glissas coma de fifres de bòsc , e rossas, e que lusissan coma si èran d'aur. N'i a dins leis vitras deis bolengiers de pans e de panets, de briòchas, de braçadèus ! E puèi que l'i a qu'embraie mièlhs qu'aquò ? Vòstre marrit a fam e brama entorn de vos en peutirent vòstre cotilhon ? « tè, mon jòli, vaquí un sòu e quesa-te; vène , qu'anèm querre un panet vès lo bolengier. » e lo marmalhon vos tortilha quò d'un ren de temps, e d'un ren de temps tòrna tamben bramar de fam.

Me sovento que de mon temps , quand anavo a l'escòla, ma maire me copava una bòna pèça , que fasiá lo torn de la glissa, d'un pan qu'ela aviá pastat e poei vos afortir que quand l'aviáu tortilhat, n'aviáu per un bòn moment avant d'auvir renar mei tripas. L'urós temps quand ma maire me menava aubé s-ela au forn en m'aprometent de me faire una foiaça si èro brave ! Embé qunta afeccion la sonhavo desparèisser dins la barja dau forn quand lo fornier la forrava dins un caire aubé sa granda pala ! Lei lebras me tetavon dau temps que coiá e quand se dubriá lo forn pèr veire coma lo pan se portava, e que sortián lei foiaças, auriá faugut veire coma sautavo sus la mieuna, que me brutlava lei dets e que me fasiá pipiá per çò qu'èra tròp chauda e qu'ausavo pas la manjar

tirat de « Ma glena » d'Ernest CHALAMEL, paja 225 e botat en grafiá classica.




Data de creacion : 27/01/2013 : 18:01
Darriera modificacion : 27/01/2013 : 18:07
Categoria : - La Dictada Occitana
Pagina legida 4660 còps

Pòrta d'Òc
Rechèrcha
Rechèrcha