Presentacion
Centra de Ressorgas
Toponimia
Calendièr
Visitas

 454968 visitaires

 8 visitaires en linha

 
Dictaa Occitana 2013
 Escriure un jorn, per capitar l’esvea de parlar chasque jorn

dictaa_2013_1.jpgSi coneissètz Anonai, coneissètz lo GOLA, lo Gropament de las òbras laïcas d’Anonai. Aquel luòc de l’accion culturala e esportiva, en plena vila, aculhiguèt aqueste an la dictaa occitana. Quela manifestacion populara es franc a sa plaça dins una estructura afiliaa a la FOL d’Ardecha, que sa devisa se pòt legir chasque mes en tèsta de sa revista Envol dempuèi mai de 50 ans— e en bòna lenga occitana — Montarem tant que poirem !

Lo coratge mancava pas en dengú per escalar los chamins de l’ortografia, que son ben de còps un pauc sauvertós… Èran un bòn cinquantenat de volontós acampats de pranhèira per la dictaa, amai los supèrmotivats s’èran trobats dins la matinaa per aprene los rudiments que chau conéisser per escriure de biais. N’i a megeus que venguèron a l’exprès de Lion per aquò. E de joines encara !dictaa_2013_2.jpg

Aviam chausit una cronica dau Revessin espelia au mes de janvièr de 2010 dins lo Réveil, lo setmanièr de Nauta Ardecha. Aquel tèxte, sòbriament titolat Escriure, èra lo tot promièr d’una tiralònja d’articles qu’espelisson d’ara enlai chasca setmana e que fan que lo monde de nòstra region pòn legir aumens aquò regularament en occitan.

L’associacion Parlarem en Vivarés, los IEO d’Ardecha, de Droma e Ròse-Aups qu’organizavan cotria aquela manifestacion, remenèron qu’es possible d’aprene l’occitan dins los cors per adultes dins totes los caires de nòstra Occitània. Se tornèt afortir l’imperiosa necessitat d’aver una politica d’ofèrta sistematica en lenga occitana dins totes los domenis de la cultura viva. Aquí se mençonèt l’abséncia escandalosa de filmes occitans dins la programacion de l’important Festival du premier film d’Annonay que duèbre sas pòrtas lo 1ièr de feurièr, e que dins sas 29 promèiras edicions mostrèt solament, pareis, un filme dins nòstra lenga…
dictaa_2013_3.jpg

Per portar la pròva que fai pas besonh d’esperar las programacions oficialas per produire d’espectacles de granda qualitat, lo Marc Noalha e l’Ugueta Beton nos galèron per achabar aube un formidable concèrt de chançons qu’esperaràn pas la dictaa 2014 per las portar a totas las auras dau país occitan.

<Rendut-còmpte de Denis Capian>


Data de creacion : 27/01/2013 : 17:41
Darriera modificacion : 27/01/2013 : 17:55
Categoria : Centra de Ressorgas - La Dictada Occitana
Pagina legida 4840 còps
Precedent  
  Seguent

Pòrta d'Òc
Rechèrcha
Rechèrcha