Presentacion
Centra de Ressorgas
Toponimia
Calendièr
Visitas

 454968 visitaires

 8 visitaires en linha

Chaminanças d’encuèi, a l’escota dau passat
per viure e chantar deman…

chamin.jpgAqueste dissabte 17 de setembre, lo patrimòni occitan fuguèt onorat a  Chabrelhas (26). Dins la patria de Gacien Almoric, felibre dromenc, Daufinat-Provença, Tèrra d’Òc, Institut d’Estudis Occitans de Droma e leis Amics de Chabrelhas avián decidit una jornada : Chaminanças d’encuei,  viatges dins lo temps e dins la memòria, per presentar dins la serada lo CD Chamin d’avuro (Chemin d’aujourd’hui), realisat per JB Plantevin e Rural Café.

Leis Amics de Chabrelhas nos an presentat son vilatge, ambe son passat cargat d’istòria e son bèu jardin botanic. Era un cadre meravilhós per aquestei « Chaminanças », dins l’escota atentiva d’un quarantenat d’auditors. Ansin Joan-Lois Ramel e Joan-Bernard Plantavin an evocat la memòria dau passat e l’art dau collectage ; Valeria Pasturel, etnològa, a marcat la realitat d’un païsatge sonore dins Droma ; Patric Mazellier, etnomusicològue, a pausat la question dau renovelament d’aquesta musica tradicionala. L’auditòri participèt ansin en aquesta recerca d’una musica identitaria actualisada, òbra totjorn de faire.

Chabrillan 2011 145.jpgTotei lei conferenciers an gramarciat fòrça lo monde nombrós que leis avián ajudats per aqueste trabalh, entre autrei  Jòrgi Edel, Cristian Espinas, Ives Bertrand, Alan Bourras, Girard Bayle, leis universitàris : Joan-Claudi Bouvier e Joan-Claudi Rixte, e subretot Han Schook. Aquèu, olandès d’origina, apassionat per la lenga d’òc de Diá e dau Trièves,  nos aviá mandat una letra per parlar de son trabalh de colectage. A escrich un molon de libres que marcan lo paisatge sonore de la region ambe totei sei particularitats tant per lo vocabulari que per lei continas, cançons, dictons e contes locaus. Podiám solament regretar que siague pas present en aqueste jornada.

Aquelei Chaminanças an continuat ambe la visita dau vilatge e dau jardin botanic, commentada per leis Amics de Chabrelhas. Eran tanben de Chaminanças per lei repais pres a l’auberja Centre La Plana, que lo bastiment es una restauracion ben polida d’una bastida anciana…

Chabrillan 2011 151.jpgLa sala dei festas era combla per aplausir calorosament lo concèrt « Chamin d’avuro » presentat per JB Plantevin e Rural Café. Lo balèti animat per Rural Café finissiá la serada, per lo grand plasèr de tot.lo monde.

Mr A.Charrier, Conse de Chabrelhas e de Mr H.Mariton, Deputat e Conse de Crest, son estats presents en aquela jornada e lei gramarciam de son sostenh.

 

A l’an que ven per una edicion novela  d’aquesta jornada dau patrimòni dromenc.

Lo programa en PDF


Data de creacion : 21/09/2011 : 21:17
Darriera modificacion : 21/09/2011 : 22:16
Categoria : Centra de Ressorgas - Jornaas dau patrimòni
Pagina legida 5836 còps
Precedent  
  Seguent

Pòrta d'Òc
Rechèrcha
Rechèrcha